வானிலை அறிக்கை

மழை பெய்யும்

என்று சொன்னீர்கள் ,

குடையோடு சுற்றிக்கொண்டிருந்தோம் .

மழை பெய்யாது என்று சொன்ன நாளில் ,

கொட்டிய மழையில் நனைந்தோம்.

ஏதேனும் ஒருநாளில்

நீங்கள்

பெய்யும் எனும்போது

பெய்கிறது மழை.

மீண்டும்

                                                 


ஏதோ ஒரு நாளின் காதல்
சற்றே  பூவின் வாசம்
எதற்கோ வந்த கோபம்
காரணமில்லா புன்னகை
தேநீர் குவளையின் சூடு
நனையும் மண்ணின் வாசம்
எல்லாம்  தேடி வந்து
என் வாசலில் கொட்டித்தீர்த்தது
மழை
மழை போன பின்னும்
அவை வழிந்து கொண்டே இருக்கின்றன
ஜன்னல் கம்பிகளிலும்
தாழ்வாரத்திலும்
என் விரலிடுக்குகளிலும்
இன்னும் பிறவிலும்

மழை

பல நாள் சென்று
இன்று வந்தது
மழை


சாரல்  போல
எங்கோ
சில துளிகள்
எனாமல்

வானம் சுருக்கி
இடி மின்னல்
என பெருமழையாய்

எனை காணவென
இன்று
வந்தது மழை

என்ன கொண்டு வந்தாய்
எனை காண என

வேறு எதை கொண்டு வரவென
தலை கோதி
கன்னமிழைத்து
எனை கொண்டு தந்தேன்
என்றது
மழை

இன்னொரு நாளில்

வருவாயோ என்றேன்
வரலாமே   என்றது
வரலாம்  என்றேன்
வருவேன்  என்றது
என்றோ என்றேன்
இன்னொரு  நாளில் என்றது
இன்னும் ஒரு  நாளிலோ  என்றேன்
ம் ..பின்னர்  ஒரு நாளில் என்றது
பல நாள் போனது என்றேன்
இன்னமும் சில போகட்டுமே என்றது
நாள் நில்லாதே என்றேன்
செல்லட்டுமே என்றது
பொல்லாத்தனம் என்றேன்
பொல்லாதவள் என்றது
சொல்லால் அயர்ந்து
சுணங்கிக் கிடந்தேன் ...
இடியாய் மேளதாளம் கொட்ட
நான் நினையாத ஒரு நாளில்
என் வாசல் வந்து
சதிராடிச் சென்றது
மழை 

மழை

ஏதுமில்லா
ஒற்றை இரவில்
விழித்தே கிடந்தேன் நான்
கண்மூட மறுத்து
சோம்பலில் சுகித்திருந்தேன்
வேடிக்கை பார்த்திருந்தது
வெறுமை


கருத்திருந்தது வானம்
கண்சிமிட்டி  காணாமல் போயின
நட்சத்திரங்கள்
என் தலை வருடிக்  கடந்தது
நிலா
என் கன்னம் கிள்ளிப் போனது
காற்று


இன்னமும்  விழித்திருந்தேன்
பிடிவாதமாய்
கண்டிப்பதாய் வந்து போனதொரு
மின்னல்
பெருமூச்செறிந்து அகன்றது
காற்று


கனவுகள் அமர்ந்து
இமை அயர்ந்த நொடியில்
ஜன்னல் ஓரமாய் எட்டி
விளையாட்டாய் நீர் தெளித்து
உறக்கம் கலைத்து
இரவெல்லாம் என்னுடன் கதைத்திருந்தது
மழை

 

மழை

                                                            



தூர தேசமொன்றில்
தொலைந்து போயிருந்தேன் நான்
பெயர் அறியாத தெருக்களில்
உலவித் திரிந்தேன்


யார் இவள்  என
கிசுகிசுத்து  போனது காற்று
முகம் காண
வந்து போனதொரு மின்னல்


ஆதரவாய் கூந்தல் வருடிப்
போனதொரு மலர்
எவளோ  என கடந்து
போயினர் பலரும் 


யாரும்  இல்லாமல்
முகவரியற்று
நான் போன
அந்நாளில்


தேடி வந்து 
என் தோள் பற்றி
நானிருக்கிறேன் என
கரம் சேர்த்து 
என்னுடன் நடந்தது
மழை ......

மழை

வெயில் தகித்த ஒரு கடும்நாளில்
எதிரெதிராய்  வீதியில்
நானும் வெயிலும்


கண் எரித்து
முகம் கருக்கி
பாதம்  சுட்டு
எக்காளமாய்
என் தாடை சுடும்
பொல்லா வெயில்


கண் மறைத்து
நிலம் நோக்கி
வியர்வை குளித்து
தாகித்து   நான் ....
இன்னும்  கிட்டத்தில்
எனை சாடும் வெயில்


என் தவிப்புணர்ந்து
வந்து
சடசடவென பொரிந்து
வெயில் விரட்டி
வியர்வை களைந்து
சட்டென என் முகம் மறைக்கும்
குடையாய்
மழை

மழை

இன்றிரவில் 

என் வாசல் வந்து நின்றது மழை

யாசிப்பதாய்  பாவித்து ....

காணாதது போல் நான் இருக்க 

படிதாண்டி மெல்ல 

கூடம்  தொட்டு 

என் வழியெங்கும் 

முத்துக்கள் 

கொட்டி 

செல்லமாய் 

சாளரம் வழியே 

என் கன்னம் வருடி 

ஏதோவென்று 

நான் இருக்க 

பொய்க் கோபத்தில் 

 படபடவென்று  

மொட்டை மாடி ஏறி 

என் துணிகள் நனைத்து 

துணி எடுக்க 

தவிப்புடன் நான் ஓட    

என் கரம் பற்றி  

ஹோவென சிரிக்கும் மழை ......  

மழை

வெகு நாட்களாக மறந்து போயிருந்தேன் 

மழையை நான் 

எங்கோ தூர தேசம் போயிருக்க வேண்டும் 

என்று எண்ணியிருந்தேன் ..

எவர் ஊர்களிலோ தன்னை  மறந்து 

அலைந்து கொண்டிருக்க வேண்டும் என்றும் ..

வெறும்வானம் பரிகசித்த சில நாளில் 

கோபித்தே  இன்னமும்  மறந்து போனேன்  

நான் 

எனை  வெறுத்த ஒரு நாளில் 

செல்லமாய் 

என் தலை தட்டி 

கண் மூடி 

கன்னம் தொட்டு 

நான் 

என்றது  மழை  ..........

மழைப்பாடல்

மழை உங்களை முத்தமிடட்டும்

மழை உங்கள் நெற்றியில்

வெள்ளி நீர்த்துளிகள் கொண்டு தாளமிடட்டும்

மழை உங்களுக்கொரு தாலாட்டு பாடட்டும் .....

மழை நடைபாதைகளில் நடவா குளங்களை தேக்குகிறது

மழை சாக்கடைகளில் ஓடும் குளங்களை ஆக்குகிறது

மழை ,இரவில் ,எங்கள் கூரை மீட்டி

இனிய இரவுப் பாடலொன்றை இசைக்கிறது

அதோடு ,

மழையை நான் காதலிக்கிறேன்

 

 

April Rain Song

Langston Hughes

Let the rain kiss you
Let the rain beat upon your head with silver liquid drops
Let the rain sing you a lullaby
The rain makes still pools on the sidewalk
The rain makes running pools in the gutter
The rain plays a little sleep song on our roof at night
And I love the rain.

மீண்டும் மழை

மழை வெறித்திருந்த  சில நாளில்

சில்லென்றே  இருந்தது   வானம்

தாகம் தணியாமல்

அலைந்து கொண்டிருந்தன  தெருக்கள்

எங்கோ ஒளிந்திருந்தன  

பெரும் திரளான மேகங்கள்

சிறகுலர்த்திக் கொண்டன  

காகங்கள்,

வாடிப்போயிருந்தோம்

நானும் செடிகளும் ......

வானம் பார்த்தே காத்துக் கிடந்தோம்

சில சாபங்கள் சொல்லி .

மனமுணர்ந்து

என் முகம் துடைத்து

நான் பெய்யென பெய்தது

மாமழை ......

படம் :நன்றி Google images

மழை

ஏதுமில்லா வெறும் வானம்

உற்றுப்பார்க்க ஒன்றுமில்லாமல் ...

எங்கோ கைகாட்டும் சில நட்சத்திரங்கள்

அரை மனதாய் நிலா

கால் நீட்ட நாற்காலி

பிசுபிசுத்த செய்திகள்

போகாத பொழுது

ருசிக்காத உணவு

செய்ய ஏதுமில்லா அந்த

வெற்று பொழுதில்

எங்கிருந்தோ ......

வானம் பிரட்டி

கருமை பூசி

மேகம் நிறைத்து

என் உயிர் எழுப்பி

நா நனைத்து

தேனென இனித்தது மழை

மழை

                                      

                                                                         

வெயில் களவாடிப்  போயிருந்தது

என் மழையை .....

மேகங்களுள்

அதை பதுக்கி வைத்திருக்கக் கூடும்

ஒருவேளை மலைகளின்

பின்னால் கூட ....

காண சகியாமல்

கண்மூடி பயணிக்கிறேன்

என்னைப் பார்த்து

எக்காளமாய் சிரிக்கிறது வெயில்

எங்கென தேடுவாய் என

ஏளனம் செய்கிறது

மலை ஏற முடியாமல்

மேகம் எட்ட வழியின்றி

மின்னல் வரும் திசை பார்த்து

காத்துக் கிடக்கிறேன்

ஒரு துளியேனும் ... என

ஏக்கம் சுமக்கிறேன்

எவர் சொல்லி தெரிந்ததோ...

என் குறிப்புணர்ந்து

இடியால் மேகம் இளக்கி

என் கைப்பற்றி

பெரும் பிரவாகமாய்
பொழிந்தது

என் பூமியெங்கும் மழை....

படம் : http://abstract.desktopnexus.com/wallpaper/419602/

மழை

                                                              





இந்நாளில் ,
என்னுடன் கண்ணாமூச்சி
விளையாடுகிறது மழை
மேகங்களுள் ஒளிவதும்
வெளியே தெரிவதுமாக ...

மின்னலென சிரித்து
பரிகாசம் செய்கிறது
வானவில்லை அழித்துவிட்டு
அழுவதாக நடிக்கிறது

குடைக்குள் ஒளிவதும்
வெளியே வருவதுமாக
கண்ணாமூச்சி விளையாடுகிறேன்
மழையுடன் நானும்

நான் ஏமாந்த
பொழுதொன்றில்
ஹோவென சிரித்து
என்னை இறுகப் பிடித்தது மழை

சினந்ததாய் போக்குக் காட்டி
சிலிர்த்து நனைகிறேன்
கால்வரை கிச்சலம் காட்டி
கண்ணைக் கட்டுகிறது

"மழை பொழிந்து கொண்டே இருக்கும்"
எங்கோ பாடுகிறது
எவரின் வானொலியோ ..
உடல் ?
அட ,நனைந்து கொண்டே தான் இருக்கட்டுமே !



படத்திற்கு நன்றி :http://photobucket.com/images/girl+in+rain/

மழை

உரத்த குரலில்
என்னை அழைக்கிறது மழை
சின்ன தூறலாய்

சிணுங்கிப் பார்த்து  

பெரும் துளியாய்
செல்ல சண்டை செய்து

பெரிய மழையாய்

இப்போது
கோபம் காட்டுகிறது .

எது செய்வதென்று தெரியாமல்
தவிக்கிறேன் நான் ...
கதவடைத்து காது பொத்தி
காணாதது போலிருக்கிறேன்
ஜன்னலில் ஆங்காரமாய்
அடிக்கிறது மழை .
தேநீர் கோப்பையுடன்
கவனியாதது போலிருக்கிறேன்
படி தாண்டி வருவேனென
அழிச்சாட்டியம் செய்கிறது.

உரத்த குரலில் அழைத்தபடியே
இன்னமும்
பெய்து கொண்டே இருக்கிறது மழை .
இனி தவிர்க்க முடியாதென
கதவை திறந்து
தெருவில் வந்து
தயக்கமாய் கால் நனைக்கிறேன்
ஜில்லென பாய்ந்து
என்னை ஆலிங்கனம் செய்து
உச்சி முகர்ந்தது  மழை ....




படத்திற்கு நன்றி :http://www.ghulmil.com/latest-animated-fantasy-wallpapers/animated-3d-girl-in-rain-wallpaper/