வாக்காளனின் புலம்பல்

தண்ணியில்லா பொட்டலிலே
தர்மராசா நிக்குறாரு
செழிச்சு பொங்கும் பூமியிலே
பாரிவள்ளல் நிக்குறாரு
பக்கத்து பட்டியிலே
தர்மதொரை நிக்குறாரு
என் மச்சினர் ஊரில தான்
கர்ண ராசா நிக்குறாரு


ஊருக்கொரு ராசனா
ஒய்யாரமா நிக்குறாங்க
நோட்ட தான் தண்ணிபோல
தெவிட்டாம கொட்டுறாங்க
இந்த வக்கத்த பூமியில
வந்து வாச்சதொன்னும் சரியில்ல
இந்த போக்கத்த பாவிக்குன்னு
வந்து வாச்சதுவும் சரியில்ல


கலர் கலரா போஸ்டருண்டா
அட துண்டு சீட்டு தானுண்டா
வெள்ளியில தரவேணாம்
பித்தளையில் விளக்குண்டா
பக்கத்து ஊரிலெல்லாம்
எட்டு கல்லு வச்ச மூக்குத்தியாம்
ஒத்த கல்லு மூக்குத்திக்கு
இந்த ஊரில தான் வழியுண்டா


வெல வாசி ஏறிப் போச்சு
வோட்டு வெல கூடிப் போச்சு
கணக்கு சரியாகும் வர
வோட்டு போட மனசு இல்ல
துட்டு வேணாம் ,சீல வேணாம்
கொடம் கூட தர வேணாம்
ஒசத்தியா ஒன்னும் தர வேணாம்
சீப்பான நானோகாரு
ஆளுக்கொன்னு தந்தா என்ன